Ինչու՞ է պաշտոնական Թեհրանն աջակցում Բաշար Ալ-Ասադի իշխանությանը
Ակնհայտ է, որ այն, ինչ կատարվում է Սիրիայում, ոչ թե Բաշար Ալ-Ասադի իշխանության դեմ ընդդիմադիր զանգվածի, այլ, իրականում, Մերձավոր Արևելքում մրցակցող երկրների պայքարի դրսևորումն է: Սա աշխարհաքաղաքական մի խաղ է, որն ընթանում է երեք երկրների՝ Ամերիկայի Միացյալ Նահանգների, Իսրայելի և Սաուդյան Արաբիայի, մասնակցությամբ, որին վերջին շրջանում միացավ նաև Թուրքիան:
Սիրիայի և Իրանի միջև առկա ռազմավարական համագործակցությունը տարիներ ի վեր «զայրացրել» է վերոնշյալ՝ ԱՄՆ-Իսրայել-Սաուդյան Արաբիա եռյակին, իսկ արդեն վերջին շրջանում Մերձավոր Արևելքում ձևավորված լարված իրավիճակում իրանա-սիրիական հարաբերությունները սկսեցին խիստ մտահոգել վերոնշյալ երկրներին:
Իհարկե, ԱՄՆ-ն, ուղղակիորեն առանձնահատուկ շահեր չի հետապնդում Իրան-Սիրիա ռազմավարական դաշինքի առնչությամբ, Վաշինգթոնը պարզապես իր քաղաքականությամբ անուղղակիորեն աջակցում է Իրանի նկատմամբ թշնամական դիրքորոշում որդեգրած Սաուդյան Արաբիայի և Իսրայելի գործողություններին:
Վերջիններիս գործողություններն ունեն իրական նպատակներ. Մասնավորապես՝ Իսրայելը ցանկանում է, որպեսզի լիբիական սցենարը կրկնվի նաև Սիրիայում, Բաշար Ալ-Ասադի իշխանության կործանմամբ՝ Մերձավոր Արևելքի ևս մեկ «խանգարող» ուժ կչեզոքացվի, իսկ Սաուդյան Արաբիա-Իրան հարաբերություններում վերջին տարիներին ձևավորված հակասության պատճառն այն է, որ Սաուդյան Արաբիան, հակադրվելով «շիական քաղաքականությանը», փորձում է տարածաշրջանում ձևավորել «վահաբիական քաղաքականության» պլատֆորմ:
Պաշտոնական Թեհրանը քաջ գիտակցելով, որ Սիրիայի շուրջ կատարվող իրադարձությունների հիմնական նպատակն Իրանին թուլացնելն ու Մեծ Մերձավոր Արևելքի ստեղծումն է. Այդ իսկ պատճառով, Իրանը, որպես Սիրիայի ռազմավարական դաշնակից, (Իրանի և Սիրիայի միջև կնքված պայմանագրի համաձայն՝ եթե կողմերից որևէ մեկի տարածքը ենթարկվի ռազմական հարձակման, ապա մյուս ռազմավարական դաշնակիցը պարտավոր է միջամտել և օգնություն ցուցաբերել) թե՛ քաղաքական դաշտում և թե՛ տեղեկատվական պատերազմում ամեն ինչ անում է, որպեսզի փրկի իրավիճակը Սիրիայում:
Օրերս Իրանի ԶՈւ ԳՇ պետ, բրիգադի գեներալ սեյյեդ Հասան Ֆիրուզաբադիի՝ Թուրքիային, Սաուդյան Արաբիային և Քաթարին ուղղված խիստ նախազգուշացումը, թուրք-սիրիական սահմանում Անկարայի անցկացրած զորավարժությունների օրերին Իրանի ԶՈւ կողմից իրանական «Ֆաթեհ 110» հրթիռի փորձարկումը, ԻԻՀ ազգային անվտանգության բարձրագույն խորհրդի քարտուղար Սայիդ Ջալիլիի՝ Լիբանան, Սիրիա և Իրաք կատարած տարածաշրջանային այցը, ինչպես նաև օրերս Իրանի միջնորդությամբ՝ Թեհրանում աշխարհի շուրջ 30 երկրների մասնակցությամբ տեղի ունեցած համաժողովի կազմակերպումը ուղղված էին այդ նպատակին:
Իրանը քաջ գիտակցում է, որ Բաշար Ալ-Ասադի իշխանության տապալումից հետո հաջորդը «Հեզբոլլահն» է, որին չեզոքացնելուց հետո Իսրայելի անվտանգության միջավայրն ավելի կամրապնդվի և կսկսվի Մերձավոր Արևելքում վերջին շրջանում տեղի ունեցած ողջ գործընթացների հիմնական նպատակի՝ Իրանի թուլացմանն ուղղված գործընթացը:
Լրահոս
Տեսանյութեր
Ոստիկանները թույլ չեն տալիս Բագրատ Սրբազանին մուտք գործել Կիրանց
